السلام عليكم و رحمة الله و بركاته
اعزائنا الكرام ..يعيش معنا في دنيانا الكثير من القلوب و العقول الحائرة لتى هي بحاجه لناصح امين مخلص و بحاجه لنصح حقيقي و آراء واعيه في الدين من اهل الدين و في الدنيا من اهل الخبره
مع حضراتكم سنسير بين تساؤلات و مشكلات بعضاً من هذه القلوب و العقول و نتمنى ان تحظي هذه المجموعه بقراءه حضراتكم و في انتظار رأيكم و مشورتكم و ردودكم عبر بريد الجروب الذي تتلقون من خلاله الرسالة
شكراً ..و اسيبكم مع القصص
مهندسه /منار ممدوح عقل
القصه الثانيه - رجل لا يعرف الله
-------------
انا معيد اتخرجت من كليتي العمليه بتقدير كبير و اتعينت معيد ..الناس المتخلفين بيعتقدوا عادة انك عشان تكون ناجح و موفق في دراستك انك بالضرورة تكون انسان سوي ..متألق محط انظار الجميع و موضع حسدهم لدماثة اخلاقك و لشدة تدينك و لشدة قربك من الله و لرضا والديك عنك و بفضل دعا الوالدين انت شخص ناجح في المجتمع
كل عروسه تتقددم لها لازم توافق عليك و كل بيت عايز بالغالى يشتريك
ليك اصحاب و راجل رياضي و نشيط
شاب في ريعان الشباب يهابك الكثير من الطلبه في الكليه
و عاملهم على قلبك اد كده من الدروس الخصوصيه
هاتفك المحمول بتغيره كل سنه باحدث موديل و رقمك كمان بتغيره كل شويه عشان المعجبات اللى بيتعلقوا بيك من الطالبات بعد كل درس بتدرسه
عندك ايميل و بتتعامل مع الكمبيوتر كتير بس مش فاضي لحاجه ابداً يا دوب تلّحق على طلبات الأساتذه لتحضير رسالة الماجستير و الدكتوراه
زياراتك للعيله مصدر فرحه بالنسبة لهم ..اخيراً البيه المهم بيزورهم النهارده
كلامك كله بيتوافق عليه بدون ادنى معارضه ..ما انت الأستاذ و الأستاذ يعرف اكثر
وقتك مش مكفي للمجاملات و لحضور المناسبات
حياتك مليانه بكل حاجه حلوة
و في اقل من سنتين بعد التخرج انت حتتجوز اجمل بنت في الدنيا ممكن تكون شافتها عينيك ..و حتى لو مكنتش انت من وسط اجتماعي راقي لكن لأنك المعيد ..صاحب المال الكتير ..حتتحول كل حياتك لإستايل اخر حاجه
صور فرحك حيخطفوها الطلبه من بعض اول ما تنزل في المجله الإجتماعيه و حتفضل طول الوقت حديث المدينه
اغبيه
ايه معرفتوش تقروا الكلمه كويس
بقول اغبيه
كل من يفكر ان الحياة ورديه هكذا لواحد كل اللى قدر يوصل له من الدنيا انه يبقى معيد يبقوا اغبيه
فحياتى عكس ما كتبت نهائياً ...حياتى اقل ما استطيع ان اصفها به انها حياة سوداء
لا ملامح لها و لا طعم و لا لون و لا ريحه فيها
و انا حتى مش حزين لأن الحزن معناه انك نفسك تتذوق معنى تاني للدنيا و انك حاسس بحاجه جميله عايز توصل لها
بس انا لأ ..مش حاسس بأى حاجه و لا عايز من الدنيا حاجه و و لا بحلم بحاجه
لأ عايز
عايز اخس و عايز واحده تحبنى و تعمل عشانى كل حاجه في الدنيا مش قادر اعملها لوحدي
بس كده انا مش عايز حاجه تانيه خالص
اه افتكرت انا عايز حاجه كمان و خلاص عايز والدى و والدتى يتكلموا معايا مرة قبل ما يموتوا
.......؟؟
انا حياتى من البيت للكليه و من الكليه للبيت و ساعات احود على قهوة اقعد فيها من غير اصحاب اشرب شاي و قهوة و امشي
في البيت بقى انا قافل على نفسي باب غرفتى انا وحيد ابويا و امى ..يمكن بتمر ايام مبشوفهمش فيها لأنى بنزل الشغل و همّ نايمين و ارجع و همّ مشغولين و افضل في غرفتى طول اليوم بأستنى يحطوا لى الأكل على التربيزه اقوم اكله و همّ نايمين
مبحبش يشوفنى و انا بأكل و ساعات كتير اخذ معايا حاجاتى غرفتى و افضل اكل و انا قاعد امام جهاز الكمبيوتر تسليتي الوحيده في الحياة اللى بحس انى من خلالها عايش و شايف دنيا و ناس
اجمل ما في هذه الدنيا انى مش مضطر اشوف الناس و لا يشوفونى و خصوصاً انى بسبب كثرة الأكل انا بدين بشكل كبير جداً بيخليني مش نافع اعيش سنى
و رغم انى قارئ نهم بقرأ كتب كتييييييييير قوى اللا ان في كتاب واحد عمري ما قربت ناحيته و لا عايز اقرب
هو القرآن ..و اقرأ قرآن ليه و انا اصلاً مبصليش و عمري ما ركعتها .حتى الصيام و الزكاة و الكلام ده كله علاقتى بيه علاقه هامشيه جداً
اتعرفت عن طريق النت بشوية ناس حسيت انهم كويسين و عايزين ياخدوا بإيدي ...بس انا هاجمتهم و اتكلمت معاهم بطريقه بيسموها الناس سخيفه
كلهم كدابين و ممثلين محدش فيهم من الولاد مستعد يكون صديقي بجد لفتره من الزمن كلهم بيقولوا كلمتين و بينشغلوا بعدها في حالهم
محدش فيهم من البنات مستعده ترتبط بيّا و تاخد بإيدي و تساعدنى اخس و اكون مظري كويس كلهم برده بيقولوا كلمتين من باب المجامله و كلواحده فيهم حتى القبيحه اللى كتسواش منتظرة حسين فهمي يتقدم لها
و انا مش عيل عشان ينضحك عليّا بكلمتين ..حتى الكتب الكتير اللى بقراها مبصدقهاش كلهم كدابين ..كلهم عمّالين يقولوا كلام جميل يزوقوا بيه وجه الحياة المزيف القبيح محدش عايز يقول الحقيقه ان الدنيا قبيحه ..كلهم كدابين و انا مش بصدق حد ...كلهم غشغشين و منافقين
و اصدقهم ليه اذا كان ربنا مبصدقهوش ..انا اصلاً معرفهوش
ناس كتير قالوا لى لو حاولت تصلى و تقرأ في كتابه حتلاقيه و تعرفه
بس انا قلت لهم محدش بيدور على حاجه ميعرفهاش كتر كلامي مع الناس فهمنى ان عندي مشكله انا مش بحسها
انا مش لاقي نفسي و مش شايف بكره و كل املى متعلق بواحده تاخد بإيدي عشان تساعدني اتغير و اكون زي الناس العاديين ...بس المشكله انى مش راضي باى واحده
في مواصفات صارمه قوى في راسي من حيث الشكل و القوام و المستوي الإجتماعي عايزها جميله قوى و رشيقه قوى و شعرها ناعم و بشرتها بيضاء و بنت ناس قوى و عايز مخها يكون زي مخى يعني توافقنى على رأى و تعليمها يكون عالى
معنديش حاجه اقدمها لها ..محوشتش قرش ..عايزها تقبلنى بعيوبى ...عايزها كمان متشتغلش عشان تراعي بيتها و جوزها انا مبحترمش الست اللى بتشتغل او الست اللى ليها دور اجتماعي بحس انها منافقه و بتقصر دايماً بعد الزواج في بيتها و اولادها ..عايزها هي اللى تعمل كل حاجه في بيتنا لأنى معنديش استعداد اعمل اى حاجه
عايزها هي اللى تساعدنى انى ابتدى اعمل حاجه ..هي اللى تعرفنى اللى معرفوش ..تعرفنى على نفسي و على الله
في ناس كتير لمّا بعرض عليهم آرائي دي بيقلبوهالى حكم و مواعظ
و انا مصر على رأى
و حتى لو كنت غلطان زي ما بيقولوا انا حتى مش شايف الباب الصح منين ..مش عارف إزاى ممكن اتغير لوحدي عشان اقدر الاقي في نص الطريق حد يساعدنى زي ما بيقولوا
معنديش ادنى استعداد احاول اتكلم انا مع والدى و والدتى و اصلح اللى انكسر ما بيننا مع انى ساعات بيكون نفسي الحقهم و همّ عايشين لأنى عارف برده انى احتمال احزن عليهم لو ماتوا
و رغم انى نفسي انهم همّ اللى يحاولوا يكلموني اللا انى كل ما بيكلموني بنهرهم و بزعق فيهم عشان مبيقولوش الكلام اللى انا عايز اسمعه
نفسي طبعاً اخس و اكون شاب وسيم و رشيق لكن بشرط متخلاش عن اى وجبه من الوجبات بتاعتى و متحرمش من اى صنف من اصناف اللى بحبها ..عايز اغمض عين و افتحها الاقي نفسي خسيت
نفسي يكون لى اصحاب بس بشرط يستحملوا طريقتي الجامده في الكلام و اعجبهم بكل افكاري الغريبه
نفسي الاقيها و تقبلنى و تعجب بيّا زي ما انا كمان ..و محتجش اتكلم معاها كويس ...عايز اتكلم معاها بفظاظه و هي تستحملنى زي ما بتستحمل الأم ابنها ..بس انا امى معادتش قادره تستحملنى ..المرض هدها و كل اللى بتعمله ليل و نهار كل ما ارد عليها بعصبيه انها تنرفزني بدعائها ليّا ربنا يهيدك و يسامحك يا بنى
يا ترى ممكن الاقي بينكم حد يقولوا حلول عشان احقق كل ده غير انى اصلى او اقرأ قرآن
انا مش رافض اصلى بس مش لاقي طريقه تجبرنى على الخطوة دي ,,مش قادر حتى احاول و مش عارف ليه ...و كل حد بيحاول يساعدنى بلاقي نفسي برده مش قادر اسمع كلامه
همّ بيقولوا ان ربنا قادر على كل شئ ..اذا كان ربنا مش عايز يساعدنى مش عايز يبعت لى البنت اللى بدور عليها عشان تاخد بإيدي و تخليني اصلى و اقرأ قرآن هو مش عايز ...يبقى الناس حتقدر
يا ترى حد عنده حل لمشاكلى
الحل هــــــو خش الجيش هتتبهدل و هتتذل كل يوم من ناس محدش فيهم يسوى تعريفة وهيتمسح بكرامة اللى جابوك الأرض ومن هنا هتلاقى الآتى:
ردحذفنفسك فى مخرج ومش هتعرف تخرج ساعتها هتلجأ لربنا وبعدين هتعرف قيمة أبوك و أمك وأنا هما دوولا الناس الوحيدين اللى حبوك زى ما انت من غير قيد ولا شرط
الميزة الأخيرة هتاكل الوجبات كلها و قدها مرتين تلاتة بس مش هتستمع بولا أكلة فيهم من كتر الرياضة والإجهاد طوال اليوم من التدريبات، بالإضافة للبدلة العسكرية البنات كلها هتتشدلك جدا، لأنك ساعتها هتكون سوبر مان فى نظرهم..... ده الجواب الفالصو لو حبيته
الجواب الأصلى: الحياة مش كتب ولا عمرها ما كانت نت، الحياة تحيها يعنى تنزل وتقفل بقك شوية وتسمع الناس حواليك مش مهم كلامهم يعجبك لأن بالضرورة مش مهم كلامك يعجبهم، ثانيا البنات عاملين زى جنينة الورد أو زى طبق الفواكه، كله حلو بس بطريقته، طريقة طلبك للبنت ساذجة جداً تدل على قلة خبرتك العملية فى المجال ده بشكل ينرفز، البنات أسهل مما تتخيل بس فيه واحدة تعجبك وممتستحملهاش وواحدة ماتعجبكش وتعجب ناس تانيين بس تستحملك.... مش هتفهم كلامى إلا إذا عشت تجارب مع بنات لأن ساعتها هتعرف فعلا حكمة كبيرة من عند ربنا ليه خلق الذكر و الأنثى و هتصلى لوحدك ساعتها لأنك هتبدأ تفهم اللى عمر ما حد يقدر يفهمه لحد.
تحياتى يا عزيزى الحائر
ملحوظة أخيرة: أنت مش عايش لوحدك فى الدنيا، ولو هتمشى بالبنت ديه هتقدملى إيه يبقى حضر نفسك باللى تقدر تقدمهلها فى المقابل.